Du septiesme juillet mil Vc quarente et ung

Touchant les gardes de la Monnoye de Paris et Denys Marcel

Maîstres Jehan Barbedor et Guillaume Sottin, gardes de la Monnoye de Paris, ont dit et remonstré en la Chambre de céans qu'ilz ont trouvé courans par les bourses dix escuz solleil monnoyez en la Monnoye de Paris le XXVIIIe jour de ju[i]ng dernier passé par ung nommé Denys Marcel, l'un des monnoyers de lad. Monnoye de Paris du serment de France, par inadvertance ou autrement, soubz la pille de deniers grans blancs douzains et trousseau d'escuz, lesquelz dix escuz lesd. gardes ont présentement monstré et exhibé en lad. Chambre et ont dict et déclairé que led. Marcel peult avoir monnoyé soixante ou quatre-vingtz escuz semblables aux desusd. et lesquelz incontinant après la délivrance faicte furent baillez à Françoys Perdrier, prévost des monnoyers de lad. Monnoye. Après avoir ouy en lad. Chambre lad. remonstrance et lesd. Françoys Perdrier et Marcel et que led. Perdrier a déclairé qu'il n'avoit plus lesd. escuz ains les avoit baillez à plusieurs personnes ausquelz il avoit à besongner, il a esté ordonné à telles faultes et abbuz aud. Perdrier qu'il ait à recouvrer le plus dilligemment que posible luy sera lesd. escuz à luy baillez faictz soubz lad. pille de grans blans douzains comme dit est pour iceulx estre fonduz en lad. Monnoye et aud. Marcel ait esté faictes deffenses de par lad. Chambre de ne plus commetre telles faultes ou fait du monnoyaige d'icelle Monnoye sur peyne de telle amende et pugnicion que lad. Chambre verra estre à faire, et quant ausd. dix escuz présentement apportez par lesd. gardes en lad. Chambre ils ont esté couppez et sizaillez en icelle et renduz ausd. gardes pour iceulx estre fonduz en lad. Monnoye.