Requeste présentée au roy par les consulz, manans et habitans de la ville de Tarascon, requérant par icelle estre ouvré Monnoye en lad. ville
Au roy et à nos sieurs de son privé Conseil. Supplient très humblement les consulz, manas et habitans de votre ville de Tharrascon en Provence, comme lad. ville soit située et assise aux limittes de votred. pays de Provence où les marchans estrangers pour leur trafficque de marchandise ont accoustumé venir portans diverses espèces de monnoye différentes aux votres, au moyen de quoy de tout temps et d'ancienneté y a tousjours eu Monnoye ouverte pour la conservance des trafficques des marchans estrangers qui journellement arrivent du long du ryvage du Rosne et aultres marchans de votre royaulme, ce considéré, sur et pour le bien d'icelle ville et dud. pays, il vous plaise déclarer que ladicte Monnoye de Tharrascon n'est comprinse ou nombre des Monnoyes par vous réduictes et icelle remetre et restablir à la forme et manière accoustumée, et vosd. suppliants pryeront Dieu pour votre prospérité et santé.
Et au-desoubz est escript ce qui s'ensuyt :
La présente requeste est renvoyée aux généraulx establys sur le fait des monnoyes à Paris, pour sur le contenu en icelle envoyer leur advis au roy en son Conseil privé. Faict à Sainct-Germain-en-Laye, le premier jour de fébvrier mil VcXLV. Ainsi signé Lalemant.

Advis de la Chambre [des monnaies] sur la requeste cy-dessus transcripte.
Les généraulx des Monnoyes du roy. Veue la requeste cy-dessus présentée aud. sieur et nosseigneurs de son privé Conseil par les consulz, manans et habitans de la ville de Tarascon en Prouvence, ausdits généraulx renvoyée, du premier jour de février mil cinq cens quarente-cinq, suivant les informations faictes par ordonnance dud. sieur du lieu le plus commode pour ouvrir Monnoye ès pays de Prouvence, Folcaquier et terres adjacentes, advis sur ce donnez et déclaration dud. sieur sur ce faicte, sont d'avis que les Monnoyes d'Aix et Marseilles peuvent subvenir de monnoye[s] lesd. pays d'autan que led. pays n'est de grande estandue et qu'il n'est nécessaire de faire ouverture de la Monnoye de lad. ville de Tarascon actandu la proximitté des Monnoyes d'Aix, Montpellier et Villeneufve Sainct-André-les-Avignon estans sur la rivière de Rosne, et où la Monnoye seroit ouverte aud. lieu de Tarascon les maistres particulliers desd. Monnoyes à l'envye l'un de l'autre surachepteroient les marcz d'or et d'argent qui pouvoit causer,comme il a esté faict par cy-devant, que les maistres desd. Monnoyes feroient mauvais ouvraige, qui seroit au grant dommaige dud. sieur et de sa républicq, joinct que en faisant les informations susd. les consulz, manans et habitans de lad. ville de Tarascon déclairèrent qu'il n'estoit besoing d'y avoyr Monnoye et que ce n'estoit que charge pour lad. ville.
Fait à Paris, en la Chambre desd. monnoyes, le vingt-sixiesme jour de juing l'an mil Vc quarente-six.