Le site des ordonnances monétaires françaises

Document

Ordonnance relative au décri des doubles ducats de Mirandole (9 juin 1526)

Ordonnance relative au décri des doubles ducats de Mirandole

[Paris], 9 juin 1526

Arch. nat, Z1b 32 f° 72v°-73r°
____________________

Ordonnance faicte sur le fait des monnoyes, publiée par les carrefours de la ville de Paris

L'en fait assavoir de par le roy, notre sire, et messieurs les généraulx des Monnoyes que nul, de quelque estat qu'il soit, ne soit si ozé ne hardi de prandre, mectre ou allouer tant en fait de marchandise que autrement les doubles ducatz d'or esquelz y a d'un costé une teste et de l'autre costé ung sainct Françoys, fait soubz le nom de Picus Mirandula. Item, autres doubles ducatz esquelz y a pareillement une teste d'un costé et de l'autre costé la figure de l'ascencion Notre-Seigneur, faiz soubz le nom dud. Mirandula. Item, autres doubles ducatz qui ont d'un costé Sainct Quiriace, évesque, et de l'autre costé ung homme à cheval tenant une espée en sa main, et les autres ducatz qui ont d'un costé une teste aiant une tocque et de l'autre costé ung sainct Françoys vomme les autres, et ce sur les peines contenues et déclairées ès ordonnances royaulx sur ce faictes. Fait en la Chambre desd. Monnoyes le IXe jour de juing l'an mil cinq cens vingt-six. Ainsi signé Le Père.

Le contenu au blanc a esté crié, leu et publié à son de trompe et cry public ès carreffours de la ville de Paris, lieux et places acoustumées à faire crys et publicacions par moy Vausy le Nourrissier, sergent à verge et crieur juré du roy, notre sire, appellé avec moy Michel Gaultier, trompete dud. sire, le samedi IXe jour de juing l'an mil cinq cens vingt-six, et ce par ordonnance de messieurs les généraulx des Monnoyes, en la présence de Thomas Choulier, huissier en la Chambre desd. monnoyes. Fait comme dessus. Ainsi signé Norissier.

Le contenu au blanc a esté crié, leu et publié à son de trompe et cry publicq en la foire du Lendit, lieux et places acoustumées à faire cryz et publicacions par moy, Vausy le Norissier, sergent à verge et crieur juré du roy, notre sire, appellé avec moy Michel Gaultier, trompette dud. sire, le mercredi treiziesme jour du moys de juing l'an mil cinq cens vingt-six, et ce par ordonnance de messieurs les généraulx des Monnoyes, en la présence de Thomas Choulier, huissier en la Chambre desd. monnoyes. Fait comme dessus. Ainsi signé Norissier.