Françoys, par la grâce de Dieu roy de France, père et légitime administrateur et usufructaire des biens de notre très cher et très amé filz le daulphin, duc et seigneur propriétaire des pays et duché de Bretaigne, à touz ceulx qui cestz présentes lettres voyront salut. Sçavoir faisons que pour le bon et louable rapport que faict nous a esté de la personne de notre cher et bien amé Jehan Taulpier et de ses sens, suffizance, loyaulté, prudhommye et bonne dilligence, à icelluy, pour cestz et aultres à ce nous mouvans, avons donné et octroyé, donnons et octroyons par cestz présentes l'office de maistre particulier de notre Monnoye de Nantes que soulloit tenir et exercer Guillaume Raboteau, vacant à présent par son trespas, pour led. office avoir, tenir et dorenavant exercer par led. Jehan Taulpier aux honneurs, prévillaiges, prérogatives, honneurs, droictz, profictz et esmolumentz accoustumez et que y appartiennent tant qu'il nous plaira. Si donnons en mandement par cestz mesmes présentes à notre amé et féal conseiller maistre Jehan Hux, général et grant-maistre de noz Monnayes en noz pays et duché de Bretaigne, que prins et receu dud. Jehan Taulpier le sermant et cauption en tel cas requis et accoustumé, icelluy mepte et institue de par nous en pocesion et saesine dud. office et d'icelluy ensemble des honneurs, prévillaiges, prérogatives, préhéminaires, droictz, profilz (sic) et esmolumentz dessusd., le facent souffrent et laissent jouyr et user plainement et paisiblement et à luy obéir et enctendre de touz ceulx et ainsi qu'il appartiendra ès choses touchantz et concernantz led. office, car tel est notre plaisir. En tesmoign (sic) de ce nous avons faict mectre notre seel à sesd. présentes. Donné à la Grant Couronne le vingt-septyesme jour d'apvril l'an de grâce mil cinq centz trante-cinq et de notre règne le vingt-ungyesme. Ainsi signé sur le reply : Par le roy, Bochetel, et seellé à double queue de cire jaulne.