Veu la requeste de Claude Robelot, maistre orphebvre à Dijon, contenant l'enchère qu'il [a] faict pendant six années consécutives de la ferme de la Monnoie dudict Dijon moiennant quinze cent marcz d'argent pour chacune desdictes six années, en marge de laquelle requeste est nostre appoinctement du quinziesme jour du présent mois de may, portant que ladicte requeste seroyt communiquée au procureur du roy en ladicte Monnoie, les conclusions d'iceluy en suitte dudict appoinctement, nous avons, en recepvant ladicte enchère, ordonné soubz le bon vouloir et plaisir de nosseigneurs de la Cour des monnoies qu'elle sera publiée, tant aux prosnes des églises parocialles que par les carrefours, lieu publicq, et affichée au-devant de la grande porte de l'hostel de la Monnoie dudict Dijon, à la forme des eedictz et arrestz pendant le temps de trois sepmaines, que touttes personnes seront receues à surdire ladicte enchère et à la charge de paier les fraiz desdictes publications et délivrance. Faict audict Dijon, le seiziesme jour dudict mois de may mil cinq cent trente-cinq. Juliot.