A messieurs les généraulx des Monnoyes Supplit humblement Pierre de la Rue, tailleur de la Monnoye de Bayonne, comme led. suppliant auroit esté institué par le roy, notre sire, oud. office de taileur dix ans a ou environ, et après je auroit bien et deuement garny lad. Monnoye de fers, pilles et trousseaulx pour la provision d'icelle à ses despens, et estoit pour lors maistre de lad. Monnoye Anthoine de Chasteauneuf, et tost après fut commis à l'exercice d'icelle Monnoye Barthelémy de Melun, à cause de quoy fut par led. suppliant fait de nouveaulx fers, pilles et trousseaulx et soubz la nouvelle différance dud. de Melun, et après que led. de Melun eut exercé icelle maistrise par l'espace d'ung an ou environ, par maistre Pierre Porte, conseiller du roy et général desd. Monnoyes, luy estant aud. Bayonne, de votre ordonnance, auroient lesd. fers faitz soubz la différance dud. de Melun estre prins et saisys et fait apporter en votre Chambre ou pallais à Paris, et aussy incontinant après auroit à Mathieu de Biran esté baillé lad. Monnoye à main ferme de par le roy jusques à six ans, à cause de quoy led. suppliant fut contrainct de faire nouveaulx fers, pilles et trousseaulx pour la provision d'icelle Monnoye soubz la différance dud. de Biran, et après que led. de Biran eut exercé quelque espace de temps icelle maistrise, maistre Claude Monperlier, aussi conseiller du roy et général desd. Monnoyes, suyvant votre commission se seroit aussi transporté aud. Bayonne et auroit prins et saisys tous et chacuns les fers, pilles et trousseaulx de lad. Monnoye faitz soubz la différance dud. de Biran et apportez en votre Chambre ceulx sur lesquelz on avoit monnoyé et les autres qui estoient neufz, près à monnoyer pour la garnison d'icelle Monnoye, auroit pareillement cassez et rompus, et auroit convenu aud. suppliant derechef faire d'autres fers et soubz nouvelle différance dud. de Biran, et depuis encores led. Monperlier seroit derechef retourné aud. Bayonne où il auroit de nouvel encores prins et saisys iceulx fers et fait apporter en cestd. ville en votred. Chambre et semblablement ceulx qui estoient près à monnoyer et en grant nombre cassez et rompus, et à ceste cause auroit icellui suppliant derecherf fait d'autres fers et soubz nouvelle différance soubz led. de Biran, lequelz sont à présent en nature et ne <...> plus à lad. Monnoye à cause de la sentence donnée par vous contre led. de Biran, à cause de quoy led. suppliant auroit et à fait et frayer de grans fraiz, mises et despens sans avoir de ce aucune récompence, ce <...> il vous plaise tauxer aud. suppliant pour ce que dit est telle somme qu'il vous plaira pour ayder à supporter lesd. fraiz et vous ferez bien. Il a esté taxé aud. suppliant, pour les causes contenues en ceste présente requeste la somme de dix livres tournoys dont sera faict et levé aquit sur Mathieu de Biran, naguères maistre particulier de la Monnoye de Bayonne. Faict en la Chambre des monnoyes ce jourdui XXII septembre mil Vc trente et cinq.