Document
Lettres envoyées aux gardes de la Monnoye de Rennes pour commectre ung personnaige suffisant à l'exercice de la maistrise de lad. Monnoye ou lieu de Jehan Ferre, jadis maistre particullier d'icelle Monnoye (20 juin 1545)

Lettres envoyées aux gardes de la Monnoye de Rennes pour commectre ung personnaige suffisant à l'exercice de la maistrise de lad. Monnoye ou lieu de Jehan Ferre, jadis maistre particullier d'icelle Monnoye

1545, 20 juin

Arch. nat., Z1b 12 f° 4r°-4v°
____________________

De par les généraulx conseillers du roy, notred. sire, sur le faict de ses monnoyes, gardes de la Monnoye de Rennes, nous avons receu [...]1 nous advertissiez de la mort de feu Jehan Ferré, jadis maistre particulier de lad. Monnoye, à ceste cause nous vous mandons que vous ayez à faire clorre toutes les boestes tant d'or que d'argent de lad. Monnoye et les nous envoyez closes et seellées de voz seaulx pour en faire le jugement, et dictes à la vefve et héritiers dudict défunct Ferré qu'ilz znvoyent procuration spécialle pour adsister au jugement desdictes boestes pour, après icelluy faict, en faire l'estat de tout de ce qu'il vous sera deu pour voz gaiges que de ce qu'il debvra au roy. Et cependant, affin d'éviter le chomaige de lad. Monnoye et que le billon ne soit transporté hors lad. Monnoye, fins et limites d'icelle, si trouvez quelque homme de bien, capable et suffisant pour excercer la maistrise d'icelle Monnoye, vous le y commectriez pour icelle maistrise de lad. Monnoye bien et deuement excercer suivant les ordonnances jusques à ce que par le roy ou nous autrement en soit ordonné, en prenant par vous de celluy que commectrez comme dict est à l'excercice de lad. maistrise bonnes et suffisantes cautions de la somme de quatre mil livre tournois, tant pour la seureté des deniers du roy que des changeurs, marchans et autres personnes qui luy livreroient matière d'or, d'argent et billon en lad. Monnoye, et luy faisant prendre nouvelle différance et contreseing pour l'ouvraige qu'il fera en ladicte Monnoye. De laquelle réception vous mandons incontinent nous advertir deuement et par escript, ensemble nous envoyez les originaulx des lettres desdictes cautions et différance, pour le tout estre enregistré au greffe de la Chambre desdictes Monnoyes ainsi qu'il est accoustume, si ne faillez d'acomplir incontinant le contenu cy-dessus. Escript à Paris, en la Chambre des monnoyes, le vingtiesme jour de juing l'an mil cinq cens quanrante-cinq.
-----------
1. Passage abîmé et illisible

© ordonnances.org, 2008. Tous droits réservés