Document

Avis des généraux des Monnaies sur la fabrication de deniers tournois en l'atelier monétaire de Grenoble (Paris, 7 mai 1550)

Avis des généraux des Monnaies sur la fabrication de deniers tournois en l'atelier monétaire de Grenoble
(Paris, 7 mai 1550)

Monnaie de Paris. Ms. F°232, f° 100v°-101r°
____________________

Advis sur la fabrication des petitz tournois

Les généraulx maistres. Veue par la Chambre la requeste cy-attachée et présentée au roy par les consulz, manans et habitans de la ville de Grenoble, tendans afin qu'il soyt mandé aux maistre et officiers de la Monnoye dudit Grenoble de faire battre aux bonnes festes de l'an certaine quantité de ['deniers', barré] petiz deniers tournois pour servir au peuple à faire aulmosnes, icelle requeste renvoyée en ladite Chambre pour informer ['de', barré] sur la commodité et incommodité et pourveoir sur le contenu en icelle ; veu aussi l'ordonnance du feu roy donnée en l'année mil VcXLVI par laquelle et pour la cause [?] y contenues est deffendu de ne plus ouvrer ne monnoyer menuz ouvraiges ès Monnoyes de ce royaulme sans permission expresse dudit seigneur, le rapport des commissaires [un mot barré illisible] d'icelle Chambre, envoyez l'année dernière où païs de Daulphiné, de la grande et excessive quantité de liards, doubles et petitz deniers ayans cours audit pays de Daulphiné, et les faultes et malversations qui ont esté commises en la fabrication desdites menues ['monnoyes', barré] ouvraiges, ladite Chambre est d'advis, soubz le bon plaisir du roy, que durant le temps de dix ans proclamé ensuivans il ne doibt estre battu, ouvré ne monnoyé aucuns liardz, doubles ne petis deniers en ladite Monnoye de Grenoble ny aultres Monnoyes de cedit royaulme. Fait en la Chambre des monnoyes, ce septiesme jour de may l'an mil cinq cens cinquante.

© ordonnances.org, 2008. Tous droits réservés