| |
Lettre
d'Henri III à la Cour des monnaies, relative à des contrefaçons
d'écus d'or
1574, 8 octobre
Arch.
nat., K902 n° 31
d'après Bordeaux (P.).- Imitations de monnaies françaises
royales et féodales faites à Messerano, Castiglione, Frinco
et Monaco.- Rev. num.- 1901.- p. 3-31
____________________
A nos amez et féaulz
conseillers les gens tenant nostre Cour des monnaies à Paris.
De par le roy. A nos
amés et féaulx. Nous avons entendu qu'il soist fabricqué
hors nostre royaume un grand nombre d'escus sols faux ou de bien peu de
valleur aux armes de France et des coings du feu roy notre très
honoré seigneur et frère, lesquels l'on dit estre si bien
faicts que malaisément pourra on cognoistre ny au poix ny à
la touche s'il n'y est de bien près regardé la faulceté
et falsification d'iceux ; ayant aussi esté advertis que ceux qui
commettent ces abbus et meschancetés ont, par gens apostés,
déjà despartys et distribués et doivent encore envoyer
un grand nombre d'iceux escus sols pour estre exposés et avoir
cours tant dehors que dedans nostre royaume, dont vous avons bien voulu
advertir afin que vous donniez tout incontinent ordre à Paris et
environs, qui sont les lieux où ils en doivent beaucoup exposer,
de descouvrir ceux qui feront la distribution desdits escus pour en empescher
le cours et en faire si bonne et prompte justice qu'elle soit exemplaire.
Voulant aussi que vous en avertissiez incontinent nos aultres officiers
des Monnoyes résidants ès autres endroits de nostre royaume,
à ce que de leur part ils y aient aussi soigneusement l'oeil et
que chacun d'eux fasse son debvoir et mette peine de descouvrir et empescher
cette si pernicieuse meschanceté tant préjudiciable à
nous et au public ; et s'il se peut recouvrer desdits escus, nous désirons
qu'il nous soit envoyé incontinent et sur ce fait entendre l'abbus
et faulceté que y trouverez, et vous nous ferez service très
agréable. Donné à Lyon le 8e jour d'octobre 1574.
Signé HENRY.
|
